Stephen Hawking

Stephen William Hawking (stiːvən_ˈhɔːkɪŋ ) (8 de xineru de 1942, Oxford – 14 de marzu de 2018, Cambridge) foi un físicu teóricu, astrofísicu, cosmólogu y divulgador científicu británicu. Los sos trabayos más importantes hasta la fecha consistieron n'apurrir, xunto con Roger Penrose, teoremes al respective de les singularidaes espaciotemporales nel marcu de la relatividá xeneral, y la predicción teórica de que los furacos negros emitiríen radiación, lo que se conoz anguaño como radiación de Hawking (o dacuando radiación Bekenstein-Hawking). Yera miembru de la Real Sociedá de Londres, de l'Academia Pontificia de les Ciencies y de l'Academia Nacional de Ciencies d'Estaos Xuníos. Foi titular de la Cátedra Lucasiana de Matemátiques (Lucasian Chair of Mathematics) de la Universidá de Cambridge dende 1979 hasta la so xubilación en 2009. Ente les numberoses distinciones que-y foron concedíes, Hawking foi honráu con dolce doctoraos honoris causa y foi gallardoniáu cola Orde del Imperiu Británicu (grau CBE) en 1982, col Premiu Príncipe d'Asturies de la Concordia en 1989, cola Medaya Copley en 2006 y cola Medaya de la Llibertá en 2009. Hawking padecía una enfermedá motoneuronal rellacionada cola esclerosis llateral amiotrófica (ELA) que foi agravando'l so estáu col pasu de los años, hasta dexalo casi dafechu paralizáu, y forzólu a comunicase al traviés d'un aparatu xenerador de voz. Tuvo casáu en dos ocasiones y tuvo tres fíos. Algamó ésitos de ventes colos sos trabayos divulgativos sobre Ciencia, nos qu'alderica sobre les sos propies teoríes y la cosmoloxía polo xeneral; estos inclúin A Brief History of Time (curtia historia del tiempu, n'asturianu), que tuvo na llista de best-sellers del The Sunday Times británicu mientres 237 selmanes.